تورکی شعرلر

گوزل باخیش لار یازیلاریزینان بو وبلاقی گوجلندیرین

آخشاملار - علی آقا واحد دن


دوشنده طره‌ی دلبر خیاله آخشاملار

محبّت اهلی باتار مین ملاله آخشاملار

شکسته بولبوله بنزه‌ر بلا چکن عاشیق

گولوندن اؤتری ائدر آه و ناله آخشاملار

گونوزلر عاشیقه طعن ائتمه کی، گولوب دانیشیر

سالار فراقین، اونی گور نه حاله، آخشاملار

دوشنده زولفون اوزه، قاشلارین خیاله دوشر

باتاندا گون، باخار عالم هیلاله آخشاملار

شرابی یارسیز ایچسه‌ن بیر آزدا غم گتیره‌ر

گول اوزلی یار ایله اول هم ‌پیاله آخشاملار

بیر اؤزگه لذّتی وار، عاشیق‌ایله معشوقه

رقیب‌سیز اولا محرم وصاله آخشاملار

میسّر اولماسا گوندوز سنه شراب ایچمک

اوُنوتما، واحد، اونی لامحاله آخشاملار

آردینی اوخو
جمعه 25 تیر 1400
بؤلوملر : واحد,

حوسین عاریفین شعرلری دوزدن خاصادی


گل چیخاق سئیرینه اوجا داغلارین،
چمن اولان یئرده، خالچا نه لازیم؟!
گؤزوندن سو ایچک بوز بولاق‌لارین،
لیل‌پار اولان یئرده دولچا نه لازیم؟!

نه کامان گؤتورک، نه تار، نه قاوال
اوردا نغمه ده وار_نغمه‌کار دا  وار.
یاریب بولودلاری دینه‌نده قارتال،
او سسه برابر بیر سس هاردا وار؟!

گاهدان یاغیش یاغیب، کولک اسسه ده،
قورودار چارداق‌لی قایالار بیزی
اطرافی چَـن توتوب دومان کسسه ده 
بلدچی جیغیرلارا آپارار بیزی.

تورپاغین عطرینی فیکیرلشنده،
ایپک تئل‌لرینه چیچک تاخارسان.
سحرلر یادینا گوزگو دوشنده،
مارال باخان گؤله سنده باخارسان.

تیتره‌مه سویوغا، یانما سازاغا
اوشوسَـک اوت‌لاردان یورغان ایستریک
داش_کسسک توخونسا أله _ آیاغا،
لقمان چیچک‌لردن درمان ایستریک.

ظلمت گئجه‌لرده پارلایان شیمشک
یول اوسته گؤز قیرپان مایاک دئییل‌می؟!
گلین طبیعتی بیزده دوشونک
او اؤزو هر شئیی دوشونن کیمی.

حوسین عاریف

آردینی اوخو
دوشنبه 27 اردیبهشت 1400
بؤلوملر : حوسین عاریف,

بیر بیت فضولی دن



هر کیمه دوْست دئدیم دۆشمن جان اوْلدو منه
دۆشمن اؤز بختیم ایمیش، ایندی عیان اوْلدو منه!

محمد فضولی

آردینی اوخو
چهارشنبه 8 اردیبهشت 1400
بؤلوملر : فضولی,

یالانچی چوبان

http://turkisheer.arzublog.com/uploads/turkisheer/saber-1.jpg


بیر چوبان بیر گۆن ائتدی داغدا هارای:
«جاناوار وار، -دئدی، -گلین، ای وای!»

اهلی قَریه یۆیۆردۆ داغ طرفه
گئتمسین تا قویون قوزو تلفه

بونلاری مضطرب گؤرۆنجه چوبان
گۆلمیه باشلایێب دئدی: «یالان

سیز بونو سانمایۆن حقیقتدیر
داماغێم گلدی بیر ظرافتدیر!»

بئناوالار قایۆتدی، لیک چوبان
یئنه بیر گۆن داغ اۆزره قێلدێ فغان

«جاناوار وار!» -دئیه باغێردی یئنه
قریه اهلینه کؤمک چاغێردی یئنه

کندچی‌لر ائتدیلر دوباره هجوم
یئنه اولدو یالانلێغێ معلوم

دوغرودان بیر زامان بزمی-شکار
قویونا گلدی بیر نئچه جاناوار

هرچی داد ائیلدی چوبان، یاهو!
ائشیدنلر دئدی: یالاندێر بو!

بو سبب‌دن هرایه گئتمدیلیر
اونا هئچ اعتنا دا ائتمدیلیر

جاناوارلار یئدی بۆتۆن قویونو
ایشته، اوغلوم، یالانچێلێچ اویونو!

باخ، یالانچێ تانێندێ چۆن‌کی چوبان
دوغرو دئرکن سؤزۆ گؤرۆندۆیۆ یالان

هرگز، اوغلوم، یالان دئمه کی، خدا
دوست توتماز یالانچێنێ ابدا!

هم‌ ده خلق ایچره حرمتین اولماز
عزتین، قدر و قیمتین اولماز

«ائوی یاندێ یالانچێنێن -دئرلر
اونا بیر کیمسه ائتمدی باور»

میرزا علی‌اکبر صابر

آردینی اوخو
چهارشنبه 8 اردیبهشت 1400
بؤلوملر : صابر,

آخشاملار

http://turkisheer.arzublog.com/uploads/turkisheer/gece.jpg

سارایام من، ساری تئللرده یازام آخشاملار
سئوگی‌سیز سئوگیلره، خان آرازام آخشاملار

بیر گُؤیرچین کیمی چیرپینمادایام اوچماغا من
سوسموشام یوخسا سینه‌مده  آوازام آخشاملار

بو گَرایلی نفسین کؤنلو شیکسته سازی وار
طالعیمدن آرالی اَلده سازام آخشاملار

من دنیز دالغاسینین بیر بوغولان خاطیره‌سی
زیروه‌لرده دومانام، چوخدان آزام  آخشاملار

کؤک آتیب‌دیر آغاجیم مؤو کیمی بار وئرمه‌ده‌دیر
قالماقال‌دیر کی یئنه شعر  یازام  آخشاملار

یازدا چوخلو یاغیشام، یایدا گونش یاغدیریرام
من سینانسام دا، قینانسام دا، رازام  آخشاملار

آردینی اوخو
پنجشنبه 7 اسفند 1399
بؤلوملر : قیسا شعرلر,

علی اکبر پاکزاد (حداد ) دان بیر گوزل شعر

ای حسینه آغلیانلار ، آغلییون ئوز حالو زا
ایندی آغلیر کربلا شاهی ،سیزون احوالو زا
رادمردان خدا ئولمز ، همیشه  زنده دور
سیز ئولر سوز باخمیون ،بو جار و بو جنجالو زا
امت بی غیرتی ، نیلیر امام تشنه لب ؟
احتیاجی یوخ سیزون، بیرقطره اشک آلو زا
آغلاماخ وئر مز نتیجه ،عزت دین اولماسا
یا گولون یا آغلاییون ،یا کول یاخون سقالو زا
شیمردن آرتیق حسینه، سیز اذیت ایله دوز
ای خلاف شرع ائدنلر ، بیرباخون اعمالو زا
شیمربیردفعه حسینی ئولدوروب  ، مین دفعه  سیز
ئولدوره ر سوز گر دوشه ، ایندی سیزون چنگالو زا
سوزلروز غیبت دی ، بهتاندی، یالاندی ، ایفترا
نه وئره رالله، سیزون بو خشکه قیل و قالو زا
بیر بئله داد و فغان ائتدوز ، حسینه  آغلادوز
ای منافق لر ،نه آلدوز باغلادوز دسمالو زا
نور چشم مصطفی ، محبوب رب العالمین
دوز مسلمانی سوه ر ،آند اولسون ایستیقلالوزا
خامس آل عبانین، بولمه دوز مقصودینی
ایسته دی بلکه وئره ،رونق سیزون اجلالو زا
شرقدن غربه گرک، سیزلراولیدوزحکمران
لیک سیز آماده سیز ،ایندی ئوز اضمحلالو زا
پاک دل انسان سیزی گورسه، یقین گمراه اولار
کیم سیزی ناپاک ائدیب ، لعنت گله غسالو زا
خلقی شیطان  تولایاندا ، تولوسوز  شیطانی سیز
مات و حیران قالمیشام  ، بو شیوه ایغفالو زا
یا گلون بو درگه سلطانه ،سیز اصلاح اولون
یا گئدون تابع اولون ،بیر دفعه ئوز دجالو زا
اهل قرآن سیز اگر ،قرآنیله رفتار ائدون
ناطق قرآن سیزون، باخسین گوزل اعمالو زا
زیر بار ظلمه او،عالمده  بیرآن گئتمه دی
سیز ولی ،بیر عومر آلدوز ،بار ذلت دالو زا
لعنت پروردگار اولسون ،گوروم صبح و مساء
پی پارفیندن قییرمه، یاغ ساتان  باقالو زا
واردی بیرعده حسینچی ،پاک دامن ،بی ریا
نه سیزه بنزر اولار ،نه سیزلرین امثالو زا
من سیزه اللهدن، هروقت توفیق ایسته رم
سیز ده توفیق ایسته یین،  حداد تک نقالو زا

آردینی اوخو
دوشنبه 6 بهمن 1399
بؤلوملر : علی اکبر پاکزاد,

شاعیر نجار اوغلودان بیر شعر تحفه‌سی رضا همراز


http://turkisheer.arzublog.com/uploads/turkisheer/reza.hamraz.jpg

میللی حوکومت شعری / نجاراوغلو

قورولدو تبریزده میللی حوکومت
ایشچیلر الینه یئتیشدی قدرت
دیلیمیزدن قیفیل، الیمیزدن ایپ
آچیلدی علتی نه ایدی وحدت
عزت‌له یئتیشدی آنا دیلیمیز
اؤلکه ده دوز بیر ایل تاپدی شان شهرت
تورکوجه باسیلدی کیتابلار بوتون
فرمانلار تورکوجه اولدو کیتابت
گورولدو بیر ایلده اول ایللیک ایشلر
مسئوللار ائدیردی عشق ایله خدمت
آزادلیق آختاران دوز فدائیلر
یورولماق بیلمه‌ییب چکدیلر زحمت
ملتین باشچیسی پیشه‌وری‌دی
او شئرده واردیر مین شئرجه جرات
دانشگاه بناسین تبریزده قویدو
اساسی ایشلردن ائتمه‌دی غفلت
قارنی ییرتیق کاظم چکیلدی دارا
اون ایله قورتاردی بوتون شرارات
مین اوچ یوز ایگیرمی دؤرد آذر آییندا
دوز بیر ایل یاشادی بو یئنی دولت
چوخ ایللر سوووشور اوستوندن بوگون
عزتله یاد ائدیر یئنه ده ملت
چاتمیشدی ائلیمیز اوز آرزوسونا
کؤلگه‌سین سالیردی بیزه عدالت
آزادلیق ایستردی کؤکون برکیده
کیف توتموش زمانه وئرمهدی فرصت
ایکینجی جنگ باشا چاتیب اوروسلار
گئتدی‌لر آمریکا تاپدی فراغت
دولدولار تبریزه شاه قولدورلاری
قوپدو بیر قورخولو قانلی قیامت
وور ها وور، توت ها توت، باسا باس اولدو
بیر عده فدائی تاپدی شهادت
اؤلومه نه اوچون اولدولار محکوم
آزادلیق دیل عشقی اولموشدو علت
اوخویا – اوخویا مسلخ عشقه
گئتدیلر اؤلدولر تاپدیلار شهرت
بیر عده جانینی گؤتوروب قاچدی
اوروسلار اونلاردان ائتدی حمایت
یئر ایله ایش وئریب حزبه آزادلیق
داغیلمیش دولته وئردیلر حؤرمت
قالانلار دایمی تاپدالاندیلار
شاهچیلار مین جوره ووردولار تهمت
بیر بلا گزیردی چؤلده سرگردان
شانس دان ائیله‌دی بیزه اصابت
میللت کی قانمادی خیر ایله شررین
عزته حسرت‌دیر چکه‌جک ذلت
آزادلیق آلماغا خوش یاشاییشا
علم ایله دوشونجه لازیم نه قسمت
خورافات طلسمین سیندیرانمادی
“نجار اوغلو» بیزیم بو یازیق میللت

داها آرتیق نجار اوغلو امضاءسی ایله ساتیریک شعرلری ایله آذربایجان ادبیاتیندا تانینان رحمتلی اوستاد حاج علی عطائیه بوگون بو تای آذربایجاندا حایاتدا یاشایان طناز شاعیرلریمیزین منجه ان گوجلوسو اولموشدور . او آیاغین بیزیم گئچمیشده کی نهنگ ساتیرا شاعیرلریمیزدن اولان میرزه علی اکبر طاهرزاده – صابر ، شبسترلی میرزه علی معجز ؛ علی اکبر پاکزاد – حداد ، میرزه جواد مذنب ، سئژیم قولو و اونلار کیمی‌لرین آیاق یئرلرینه قویوب جهالتله مبارزه ائتمه‌یه چالیشمیشدیر. تاسفله اونون قلمداشلاریندان اولان مجید یالقیز؛ حمید آرش و ساپلاق دونیالارین دگیشمک‌له، شاعیریمیز بیر آز غریبسه‌میشدیر. بو گورکملی شاعیری، اجتماعی مضمونلو شعرلر یازان رحمتلی رضا ایتگینین ایل دؤنومونه دایر قورولان مجلس ده گؤردوم. اورادا او منی گورمک‌همین؛ اؤزون قوجاغیما آتیب منله اوپوش – گؤروش ائدیب، گؤروش وعده‌سی قویدو. یازیقلار اولسون کی خسته‌لیک قیرموم کیمی اونون یاخاسیندان ال چکمه دی کی بیز بیر جانا سینار اونونلار اوتوروب دانیشاق . نهایت سون آیلار شاعیر نجار اوغلونون حالینین گرکین‌لیین دوستلار واسطه‌سی ایله آنلایاندان سونرا بو قراره گلدیم اونون گؤروشونه گئده‌م. جوما گونو 22/6/92 ده ادبی دوستلاردان اولان دوقتور حسین صدیق و رامین عباچی جنابلاری ایله بیرگه گوزللرین آخیره قالانلاریندان اولان اوستاد نجار اوغلونون عیادتینه گئتدیک. اونون دوستلارا سایقیسی سبب اولموشدور کی، ائویندن حیه طده بیزی گؤرجک سانکی اوچماغا قاناد آختاریردی. شاعیر ائله سئوینیردی کی ائوینده اگلشدییی صندلدن آیاغا قالخمیشدیر. اونونلا یاریم ساهاتا یاخین اوتوروب درد‌له‌شیب دانیشدیق. اوستاد نجار اوغلو دورد ائولادیندان راضیلیق ائده‌رک دئییردی کی منیم آیاق اوسته دورماغیما باعث ائله اهل – عیالیمدیر. بو گؤروشده اونون ادبی میراثیندان سؤز- صحبت گئتدی. اوستادین بویوردوغونا رغما اونون بو گونه قده‌ر یئددی جلد چاپ اولان کیتابی اولموشدور کی اونلارین بئش جلدی ائله نجار اوغلو آدی ایله جزوه – جزوه، بیریسی قات قاریشیق آدی ایله و باشقاسی دا اوز اوتوردوغو محله حکم آوارین دئمک مونوگرافییاسینا عاید اولموشدور. ماراقلی‌دیر کی شاعیر و یازیچی بونلارین هامیسین ائله تورکجه ایله قلمه آلمیشدیر. داها ماراقلی بوراسیندادیر کی ایندی اونلارین بیریسینده بازاردان آراماق مومکونسوزدور.
اونون ائوین ترک قیلاندا یازیچیمیزین حکماوارا عاید بیر کیتابینا قوناق اولدوق. شاعیر دوستوموز، همین دیرلی اثرینده آنادان اولدوغو محله‌سینین دب- دستوروندان توتدو تاریخینه کیمی الیندن گله‌نی مضایقه ائتمه‌میشدیر. قوجامان قلمداشیمیزین یاشی اونا اجازه وئریرکی بیر نئچه حوکومتی یاخیندان گؤرسون. رضا شاه حوکومتی، پیشه‌وری حوکومتی، محمدرضا شاه حوکومتی، مصدق و انقلاب. او، گوردوکلرینین بیر سیراسین شعر فورماسیندا قلمه گتیرمیشدیر.
آرزیلیریق اونون هله چاپ اولونمامیش شعرلرینین ده شاهیدی اولاق. بو آرزو ایله ائله کیتابینین 210 اینجی صحیفه‌سیندن بیر شعره سیزی قوناق ائدیب،

آردینی اوخو
دوشنبه 6 بهمن 1399
بؤلوملر : رضا همراز,

شاختــــــا بابا -- آشیق حسین عمویی

http://bayram.arzublog.com/uploads/bayram/QOPUZ_4.jpg

شاختــــــا بابا، دونیا بیزه دار گلیر،
قدیم مودلار ایندی بیـزه عار گلیر،
گول خانادا میوه گلیـــــر، بار گلیر
هر میوه دن بیزیم یــورددا اولاردی
سولار گلیب کتده آرخا دولاردی.
              ***
شاخــــــتا بابا سولار سدده شاققیلدیر
کهلیــک لرین اؤزگه یئرده قاققیلدیر،
دیش تؤکولوب مصنوعولار تاققیلدیر
ایشلــــــــــر اولوب بو زماندا اله کی
انســــان وورور بیر – بیرینه کله کی.

              ***
شاختا بابا، بیر سؤز منه درد اولــوب،
ایستی قانلی انسانلارین سرد اولوب،
باش بدنه ده یمه ینلر مرد اولــوب،
آغ ساققالین پوللو یئرین آلیبـــــدی
بئله ایشه فلک حئیران قالیبـــــــدی.

    آشیق حسین عمویی

آردینی اوخو
یکشنبه 30 آذر 1399
بؤلوملر : آشیق حسین عمویی,

دیوانیله گئتدی

http://turkisheer.arzublog.com/uploads/turkisheer/shahryar31.jpg
ییغدی خیر و برکت سفره سین، احسانیله گئتدی
امن امانلیق دا یوکون باغلادی، ایمانیله گئتدی
بیگ خان اولمازسا دئیه ردیک اولاجاق کندیمیز آباد
او خراب کتده، و لاکن ائله بیگ خانیله گئتدی
«سیلو» دایر اولالی، هر نه دگیرمان ییغیشیلدی
آمما خالص تمیز اوونلاردا، دگیرمانیله گئتدی
مستبد سلطانی سالدوق، کی اولا خلقمیز آزاد
سونرا باخدیق کی آزادلیق دا او سلطانیله گئتدی
بیر «بلی قوربان!» اولوب ایندی بیزه مین بلی قوربان
آمما «خلعت وئرن» اول بیر بلی قوربانیله گئتدی
دوز مسلمانه دیئیردیک: قولاغی توکلو دی بدبخت
ایندی باخ، گور کی او دوزلوک ده، مسلمانیله گئتدی
وئرمه «صابر» دئدی، او دولما فسنجانی آخوندا
آغزیمیزدان دا داد، اول دولما  فسنجانیله گئتدی
دئدی انسانیمیز آزدیر، هامی انسان گرک اولسون
آمما انسانلیقمزدا، او آز انسانیله گئتدی
بو قدر «دفتر» و «اسناد» له، بیر حقه چاتان یوخ
حق وئرنلر «پیتیگی» میرزا قلمدانیله گئتدی
بیزه بیر دین قالا بیلمیشدی میراث، بیرده بو ایران
دین گئدنده دئدی: «تک گئتمه رم!» ایرانیله گئتدی
ایسته دیک قانلا یوواق ئولکه میزین لکه سین، آمما
ئولکه میز خالص ئوزی لکه اولوب قانیله گئتدی
یورقانی اوغری قاپاندا، دئدی ملانصرالدین:
نیله سین چیلپاغیدی، اوغری دا یورقانیله گئتدی
هاوا انسانی بوغور باش باشا «گاز کربنیک» اولموش
یئل ده اسمیر، ائله بیر، یئل ده سلیمانیله گئتدی
سو، کرج دن «کلور» ایله گلی پاسلی دمیرده
گوره سن «شاه سویی» تک چشمه نه عنوانیله گئتدی
ترکی اولموش قدغن، دیوانیمیزدان دا خبر یوخ
«شهریارین» دیلی ده وای دئیه، دیوانیله گئتدی

آردینی اوخو
شنبه 29 آذر 1399
بؤلوملر : شهریار,

نیگار خیاوی ادگونو موناسبتیله

نیگار خیاوینن آچیق دانیشیق

http://turkisheer.arzublog.com/uploads/turkisheer/nigar_xiavy.jpg

هانسی ایل‌ده، آی‌دا و گون‌ده، هانسی شهرده، هانسی ائل ده، هانسی عاییله‌ده گوز آچدینیز بو دۆنیایا؟

– بو  سورغونون نه‌ قدر پورچوم‌لنمیش اولدوغونو سیز ده یاخشی بیلیرسینیز، بونا گوره من ده پورچوملو جاوابلایاجاغام: ۱۳۳۹/۹/۱۰، خییوو شهری، چایپارا محله­‌سی، حاج علی‌­اکبرلی طایفاسی، حاج محسن پوراکبر خیاوی عاییله‌­سی.

 

اوشاق‌لیغینیز نئجه کئچدی و او چاغ‌لاردان اونودولماز خاطیره‌لرینیز، نه‌لر اولدو؟

-اوشاق‌لیق اولچوسویله آجی‌لی شیرین‌لی کئچن اوشاق‌لیغیم‌دان هله ده قورتارا بیلمه­‌میشم. هئچ قورتارماق دا ایسته­‌میرم. هردن اوز اوشاق‌سوو حرکت‌لریمه گولورم. بیر یول اوغلوم آتاسی‌نا دئدی: آتا به سنون بو آروادین هاواخت بویویه‌جک؟

هر کس کیمی منیم ده او چاغیم‌دان اونودولماز خاطیره‌­لریم وار. تنگه-باجادا سربست جه اویناییب گزیب دولانیم دئیه، اوزومو اوغلان‌لیغا ووراردیم. آتام‌دان هم شیققیلدایان باشماق ایستیردیم، هم اوغلان‌لار کیمی الیمی یان‌دان جیبی‌نه سالا بیله­‌جه‌­ییم شالوار. هله ده یوخولاریمی او إوده، او تنگه­ده، او دارکاردا، او قونشولار’لا گؤرۆرم. آتامی ایتیرمک، قاراباسماسی یاخامی بوراخمادی هئچ‌ واخت. آتام آی‌دا بیر یول أردبیله ساواک ایداره‌­سی‌نه گئدیب سورغو سووال وئرمه‌­لی یدی. هر دفعه‌­سین‌ده بیر داها گئری قاییتماماق قورخوسو منی یئیـَردی. اوشاق آغلیم’لا ساواک ایداره­‌سی‌نین نه اولدوغونو بیلمه‌­سم ده قورخولو نه‌سه اولدوغونو سئزمیشدیم.

 

آردینی اوخو
یکشنبه 9 آذر 1399
بؤلوملر : نیگار خیاوی,