وطن حسرتی

بیر سحر یوردومدان آییریب منی
باشقا بیر شهره گتیردی قاتار.
دئدیلر: خسته‌سن، ساغالدار سنی
سویو بوزدان سویوق سرین بولاقلار.

هر داشین دیبیندن بیر ایرماق آخیر،
هر چمن ائله بیل خالی ناخیشدیر...
دئدیم: - بو یئرلرده قلبیم داریخار،
غۆربت جنّت اولسا، وطن یاخشیدیر.

گزیرم سحردن آخشاما کیمی،
یاغیشدا، دوماندا، قاردا گزیرم.
بعضاً دۆشونورم اؤز سههتیمی
هاردا ایتیرمیشم، هاردا گزیرم...

اؽندی سون پاییزین بو اوغلان چاغی
یانیندا اولسایدیم داریخمازدیم من.
چۆنکی دوغما یوردون او بوز تورپاغی
منه مئهریباندی بو گؤی چمندن.

اؽنانین قاییتسام دوغما یئرلره
بیر ده ساوالانا باخسام دویونجا،
سیزدن نه گیزله‌دیم، داها بیر کره
اۆرگیم آغریماز عؤمروم بویونجا.

۱۹۵۸

پاییز قاپیمیزی دؤیسه ده دوستوم،
باهارا نه قالدی؟ بیرجه قیش عؤمرو.
پاییزین دردینی چکمه، بیلیرسن –
گلیب کئچه‌جکدیر قار-یاغیش عؤمرو.

آغارمیش ساچیما سن باخما بئله،
یازدا چیچکلنر آرمود آغاجی.
بیلیرسن طبیعت اؤز اللریله
باشیما قویموشدور بیر گۆموش تاجی.

یازدا قار آلتیندا بنؤوشه چیخار،
قلبیمده بنؤوشه هاواسی واردیر.
ساچیمین قلبیمله فرقینی آختار،
قیش ایله باهارین داعواسی واردیر...

پاییز گلیب کئچسه، قیش دا کئچه‌جک،
تزه دون گئیه‌جک چمن ده، دۆز ده.
دئمه، قاپیمیزی شاختا دؤیه‌جک،
قارشیدا باهاردیر، باهاری گؤزله.

بؤلمه عؤمروموزو فصیللره سن،
بیر فصیل اؤتدومو گله‌جک بیری.
دۆشون نه وئرمیسن بو ایللره سن،
سنه نه وئرمیشدی عؤمرون ایللری.

۲۰۰۱

«چالخالاندیقجا، بولاندیقجا حیات نئهره کیمی،
یاغ-یاغ اۆسته چیخیر، آیرانی آیرانلیق اولور».

شعری ده، شاعیری ده سیلکه‌له‌ییر دؤورو زامان،
پیسی بیر یانلیق اولور، یاخشی‌سی بیر یانلیق اولور.
شعر وار فیکری دایاز، وۆسعتی یوخ، سیقوتی یوخ،
عؤمرو ده، شؤهرتی ده، حیسّی ده بیر آنلیق اولور.
کیمی «میلّت» دئیه‌رک میلّتی قویموش لوغازا،
کیمی هۆمّت ائده‌رک میلّته قوربانلیق اولور.
صابیر، ای شعرمیزین، عصریمیزین نابیغه‌سی،
سؤزلرین چایتک آخیب آخیری عۆمّانلیق اولور.
نئچه توفان یاشاییر دریاجا صبرینده سنین،
لال دایانمیش دنیزین آخیری توفانلیق اولور.
شعریمیز شوروموز اۆچون اگر اولسئیدی معیار،
من ده دئیردیم سن اولان قلبیده اینسانلیق اولور.

۲۰۰۰

من نه شاه، من نه سولطان، نه یاراشیق، نه زینت،
نه افسانه، نه ملک، نه سارای، نه سلطنت،
نه قدیم عصرلری یادا سالیب آغلایان،
نه عؤمرونو غزله، مرثیه‌یه باغلایان،
نه دؤورون حاکیمینه شئعر یازیب پول آلان،
نه جلّادلار اؤنونده حیات اۆچون آلچالان،
نه پئیمانا، نه ساقی، نه سراب شاعیری‌یم،
آزادلیغین جارچی‌سی اینقیلاب شاعیری‌یم.

من اییلیب حاکیمین اللریندن اؤپمه‌دیم،
شئعریمی چیچک کیمی آیاقلارا سپمه‌دیم.
نه آجیز بیر بنده‌یم، نه ساتیلمیش بیر غولام،
نه سارای مدّاحی‌یام درگاهلاردان قووولام.
من ائللرین اوغلویام، ائللر بؤیوتموش منی.
شئعریم ائلدن آلیبدیر بو ایلهامی، قۆّه‌نی.
من نه شام، نه پروانه، نه روباب شاعیری‌یم،
آزادلیغین جارچی‌سی اینقیلاب شاعیری‌یم.

منیم کؤنول دفتریم بنزه‌ییر گۆلوستانا،
اوندا یئر وئریلمه‌میش قارلی قیشا، توفانا،
بیر باهار عطری واردیر هر شئعریمده، سؤزومده،
باهارین حسرتیله یاشاییرام اؤزوم ده.
من ال آچیب گؤیلردن دیله‌مه‌دیم آزادلیق،
منیم آرخالاندیغیم اونلاردان داها آرتیق.
اؤلکه‌لر حسرت چکن آفیتاب شاعیری‌یم،
آزادلیغین جارچی‌سی اینقیلاب شاعیری‌یم.

اردبیل. ۱۹۴۱

   بالاش آبی زاده - آذر اوغلو

بالاش آذراوغلو آدی ایله تانینان بالاش آبی زاده آذربایجانین تانینمیش و آدلیم شاعیرلریندندیر. ۱۹۲۱ م. (۱۳۰۰ گ.) ایلینده باکی شهرینده دونیایا گلدی. ۱۶ یاشی اولاراق اردبیل شهرینه گلدی. ۱۳۲۵-جی ایل میللی حوکومتین سوقوطوندان سونرا باکی شهرینه قاییدیب فیلولوژی ریشته سینده تحصیلین قورتاردیر. ۲۰۱۱-جی ایلده شاعیر دونیاسین دَییشدی. ۱۳۲۱-جی ایلده حزب توده ایراندا عضو اولدو. بالاش آذراوغلو ۱۳۲۲-جی ایلده اردبیلده قورولان 'ضدفاشیست جمعیتی‌نین' قوروجولاریندان اولاراق جمعیتین یایدیغی 'ضدفاشیست' آدیندا هفته لیگی ۱۳۲۴-جو ایلیین مئی آیینا قدر رداکته ائدیردی. ۱۳۲۵-جی ایلده گرمی بؤلگه‌سیندن میللی مجلیسه نماینده سئچیلدی. ۱۳۲۵-جی ایلده تهران شهرینده ایران یازیچیلاری‌نین بیرینجی قورولتاییندا جنوبی آذربایجان شاعیرلری طرفیندن ایشتیراک ائتمیشدیر. ۱۳۲۸-جی ایلدن شاعیرآذربایجان یازیچیلار جمیعیتی‌نین صدری سئچیلمیشدیر.

آنادیلی آدلی بیر شعری

بیرگون اسیر دوشموش بیر قهرمانی
  سورغویا، سؤالا چکنده جللاد
    سیزین الینیزده اؤلمرم دئدی -
  منی زامان- زامان یاشادار حیات...
  دئدیلر: گؤزونو اویاریق سنین،
  گؤره بیلمزسن
  دئدی: یاشارام
  دئدیلر: قولونو قیراریق سنین،
  سیلاحین، کسرین دوشر الیندن
  دئدی: یاشارام
  دئدیلر: قیچینا کونده ووراریق،
  گزه بیلمزسن
  باشیندا ائله بیر تونقال قوراریق
  دؤزه بیلمزسن
  دئدی: یاشارام
  دئدیلر: نه یین وار آپاراریق بیز،
  بیرده کئچمیشینه دؤنه بیلمزسن
  دئدی: یاشارام!
  دئدیلر: دیلینی قوپاراریق بیز،
  .دانیشا بیلمزسن، دینه بیلمزسن
  سوسدو قهرمان،
  نه یاشارام دئدی،
نه اؤللم دئدی.
  سؤیله دی: نه بیلسن ائله، ای جلاد!
  دوران سنیندیر،
دیوان سنیندیر...

آذربایجانین مبارز شاعری قافلانتی و آذربایجان خالق شاعری بالاش آذراوغلو

1375 – تهران، یافت آباد – قافلانتی‌نین شخصی ائوینده کئچه‌ن شاعرلر مجلسی

شکیل، حسین ریاضی‌نین شخصی آرشیویندن دیر و ایشیق سایتی واسطه‌سی ایله یاییلیر.