ییغدی خیر و برکت سفره سین، احسانیله گئتدی
امن امانلیق دا یوکون باغلادی، ایمانیله گئتدی
بیگ خان اولمازسا دئیه ردیک اولاجاق کندیمیز آباد
او خراب کتده، و لاکن ائله بیگ خانیله گئتدی
«سیلو» دایر اولالی، هر نه دگیرمان ییغیشیلدی
آمما خالص تمیز اوونلاردا، دگیرمانیله گئتدی
مستبد سلطانی سالدوق، کی اولا خلقمیز آزاد
سونرا باخدیق کی آزادلیق دا او سلطانیله گئتدی
بیر «بلی قوربان!» اولوب ایندی بیزه مین بلی قوربان
آمما «خلعت وئرن» اول بیر بلی قوربانیله گئتدی
دوز مسلمانه دیئیردیک: قولاغی توکلو دی بدبخت
ایندی باخ، گور کی او دوزلوک ده، مسلمانیله گئتدی
وئرمه «صابر» دئدی، او دولما فسنجانی آخوندا
آغزیمیزدان دا داد، اول دولما  فسنجانیله گئتدی
دئدی انسانیمیز آزدیر، هامی انسان گرک اولسون
آمما انسانلیقمزدا، او آز انسانیله گئتدی
بو قدر «دفتر» و «اسناد» له، بیر حقه چاتان یوخ
حق وئرنلر «پیتیگی» میرزا قلمدانیله گئتدی
بیزه بیر دین قالا بیلمیشدی میراث، بیرده بو ایران
دین گئدنده دئدی: «تک گئتمه رم!» ایرانیله گئتدی
ایسته دیک قانلا یوواق ئولکه میزین لکه سین، آمما
ئولکه میز خالص ئوزی لکه اولوب قانیله گئتدی
یورقانی اوغری قاپاندا، دئدی ملانصرالدین:
نیله سین چیلپاغیدی، اوغری دا یورقانیله گئتدی
هاوا انسانی بوغور باش باشا «گاز کربنیک» اولموش
یئل ده اسمیر، ائله بیر، یئل ده سلیمانیله گئتدی
سو، کرج دن «کلور» ایله گلی پاسلی دمیرده
گوره سن «شاه سویی» تک چشمه نه عنوانیله گئتدی
ترکی اولموش قدغن، دیوانیمیزدان دا خبر یوخ
«شهریارین» دیلی ده وای دئیه، دیوانیله گئتدی

شهریورین 27 سی استاد شهریارین 30 اونجو ایل دونومون بوتون دیل داشلارامی تسلیت دئیرم

تورکی بیر چشمه ایسه ، من اونی دریا ائله دیم

بیر سویوق معرکه نی محشر کبرا ائله دیم

بیر ایشیلتیدی سها اولدوزی تک گورسنمز

گوز یاشیملا من اونی عقد ثریا ائله دیم

امیدیم وار که بو دریا هله اقیانوس اولا

اونا ضامن بو زمینه که مهیا ائله دیم

....

تورکی نین جانینی آلنیشدی حیاسیز طاغوت

من حیات آلدیم اونا ، حق اوچون احیا الدیم

...

باخ کی حیدر بابا افسانه تک اولموش بیر قاف

من کیچیک بیر داغی سر منزل عنقا ائله دیم

..

نه تک ایراندا منیم ولوله سالمیش قلمیم

باخ کی ترکیه ده ، قافقاز دا  ، نه غوغا ائله دیم

باخ کی تهراندا نه شاعرلری شیدا ائله دیم

.

تورکی واللاه ، آنالار اوخشاغی ، لایلای دیلی دیر

دردیمی من  بو  دوا ایله  مداوا  ائله دیم

شهریار حیف ساووخدیر بو دگیرمان هله ده

دارتماغا یوخدی دنی من ده مدارا ائله دیم

 

 

سید محمد حسین بهجت تبریز  1285 شمسی ایلینده تبریزده آنادان اولوب دی
آتاسینین آدی حاجی میر آقای خشکنابی و بستان آبادین خشکناب کندینین ایل دار
آداملارینان بیریمیش کی تبریزده وکالت ایشینه مشغولوموش  کی شهریار اوز شعرینده ده اونا
اشاره الیب دی

منیم آتام سفره لی بیر کیشی دی

ایل الیندن توتماخ اونون ایشیدی

گوزل لرین آخیره قالمیشیدی

اوننان سورا ، دونرگه لر دوندویلر

محبتین چیراخلاری ، سوندیلر

شهریار بیرینجی شعرلرین فارسی دیله دئیب  و اوزونه یاخشی بیر آد قازانیر
استاد شهریارین تورکی دیله شعر دئمکی بیز اونون آناسینا مدیونوخ

شهریارین اناسینین شکیلی
بیز حیدر بابا منظومه سین و شهریارین تورک شعرلرین بو بویوک خانیما مدیونوخ

حیدر بابانین سس فایلین استاد شهریارین اوز سسینن بوردان دانلود الیه بیلرسیز 

حیدربابا ، ایلدیریملار شاخاندا
سئللر ، سولار ، شاققیلدییوب آخاندا
قیزلار اوْنا صف باغلییوب باخاندا
سلام اولسون شوْکتوْزه ، ائلوْزه!
منیم دا بیر آدیم گلسین دیلوْزه
(٢)
حیدربابا ، کهلیک لروْن اوچاندا
کوْل دیبینَّن دوْشان قالخوب ، قاچاندا
باخچالارون چیچکلنوْب ، آچاندا
بیزدن ده بیر موْمکوْن اوْلسا یاد ائله
آچیلمیان اوْرکلرى شاد ائله
(٣)
بایرام یئلى چارداخلارى ییخاندا
نوْروز گوْلى ، قارچیچکى ، چیخاندا
آغ بولوتلار کؤینکلرین سیخاندا
بیزدن ده بیر یاد ائلییه ن ساغ اوْلسون
دردلریمیز قوْى دیّکلسین ، داغ اوْلسون
(٤)
حیدربابا ، گوْن دالووى داغلاسین!
اوْزوْن گوْلسوْن ، بولاخلارون آغلاسین!
اوشاخلارون بیر دسته گوْل باغلاسین!
یئل گلنده ، وئر گتیرسین بویانا
بلکه منیم یاتمیش بختیم اوْیانا
(٥)
حیدربابا ،  سنوْن اوْزوْن آغ اوْلسون!
دؤرت بیر یانون بولاغ اوْلسون باغ اوْلسون!
بیزدن سوْرا سنوْن باشون ساغ اوْلسون!
دوْنیا قضوْ-قدر ، اؤلوْم-ایتیمدى
دوْنیا بوْیى اوْغولسوزدى ، یئتیمدى
(٦)
حیدربابا ، یوْلوم سنَّن کج اوْلدى
عؤمروْم کئچدى ، گلممه دیم ، گئج اوْلدى
هئچ بیلمه دیم گؤزللروْن نئج اوْلدى
بیلمزیدیم دؤنگه لر وار ،  دؤنوْم وار
ایتگین لیک وار ، آیریلیق وار ، اوْلوْم وار
(٧)
حیدربابا ، ایگیت اَمَک ایتیرمز
عؤموْر کئچر ، افسوس بَرَه بیتیرمز
نامرد اوْلان عؤمرى باشا یئتیرمز
بیزد ، واللاه ، اونوتماریق سیزلرى
گؤرنمسک حلال ائدوْن بیزلرى
(٨)
حیدربابا ، میراژدر سَسلننده
کَند ایچینه سسدن - کوْیدن دوْشنده
عاشیق رستم سازین دیللندیرنده
یادوندادى نه هؤلَسَک قاچاردیم
قوشلار تکین قاناد آچیب اوچاردیم
(٩)
شنگیل آوا یوردى ، عاشیق آلماسى
گاهدان گئدوب ، اوْردا قوْناق قالماسى
داش آتماسى ، آلما ،  هیوا سالماسى
قالیب شیرین یوخى کیمین یادیمدا
اثر قویوب روحومدا ، هر زادیمدا