گلیبسن اوز-اوزه باخما منه بیگانه-بیگانه
اؤتورمه آیریلیق یوردون گزیم، دیوانه-دیوانه
دولاندیر بیر باخیش رطلین منیم احوالیمه گاهدان
گؤزوندن قوی ایچیم گیزلین چاخیر، پیمانه-پیمانه
نظر سال قات-قات آیریلسین جانیمدان غربت آثاری
آچیلسین شعریمین یارپاقلاری، میخانه-میخانه
سینیخ سالخاخ اورکلردن ایزین گؤرسه‌تدیلر خلقه
قالیب کؤنلوم جلالیندان ایراق ویرانه-ویرانه
منیم شوقومدور عالمده جنون رنگینده پایلاندی
گؤرور هریئرده بیرشعله، یانیر پروانه-پروانه
منم مجنون، منم لیلا منم وامق، منم عذرا
منیم دردیم دوشوبدور دیللره، افسانه-افسانه
سحر ال چک یاخامدان، حایل اولما منظر وصله
چکیل گئت بیر گؤروشله جان وئریم جانانه جانانه
حمیده رئیس‌زاده(سحر خانیم
)