«چالخالاندیقجا، بولاندیقجا حیات نئهره کیمی،
یاغ-یاغ اۆسته چیخیر، آیرانی آیرانلیق اولور».

شعری ده، شاعیری ده سیلکه‌له‌ییر دؤورو زامان،
پیسی بیر یانلیق اولور، یاخشی‌سی بیر یانلیق اولور.
شعر وار فیکری دایاز، وۆسعتی یوخ، سیقوتی یوخ،
عؤمرو ده، شؤهرتی ده، حیسّی ده بیر آنلیق اولور.
کیمی «میلّت» دئیه‌رک میلّتی قویموش لوغازا،
کیمی هۆمّت ائده‌رک میلّته قوربانلیق اولور.
صابیر، ای شعرمیزین، عصریمیزین نابیغه‌سی،
سؤزلرین چایتک آخیب آخیری عۆمّانلیق اولور.
نئچه توفان یاشاییر دریاجا صبرینده سنین،
لال دایانمیش دنیزین آخیری توفانلیق اولور.
شعریمیز شوروموز اۆچون اگر اولسئیدی معیار،
من ده دئیردیم سن اولان قلبیده اینسانلیق اولور.

۲۰۰۰