حیدربابا ، ایلدیریملار شاخاندا
سئللر ، سولار ، شاققیلدییوب آخاندا
قیزلار اوْنا صف باغلییوب باخاندا
سلام اولسون شوْکتوْزه ، ائلوْزه!
منیم دا بیر آدیم گلسین دیلوْزه
(٢)
حیدربابا ، کهلیک لروْن اوچاندا
کوْل دیبینَّن دوْشان قالخوب ، قاچاندا
باخچالارون چیچکلنوْب ، آچاندا
بیزدن ده بیر موْمکوْن اوْلسا یاد ائله
آچیلمیان اوْرکلرى شاد ائله
(٣)
بایرام یئلى چارداخلارى ییخاندا
نوْروز گوْلى ، قارچیچکى ، چیخاندا
آغ بولوتلار کؤینکلرین سیخاندا
بیزدن ده بیر یاد ائلییه ن ساغ اوْلسون
دردلریمیز قوْى دیّکلسین ، داغ اوْلسون
(٤)
حیدربابا ، گوْن دالووى داغلاسین!
اوْزوْن گوْلسوْن ، بولاخلارون آغلاسین!
اوشاخلارون بیر دسته گوْل باغلاسین!
یئل گلنده ، وئر گتیرسین بویانا
بلکه منیم یاتمیش بختیم اوْیانا
(٥)
حیدربابا ،  سنوْن اوْزوْن آغ اوْلسون!
دؤرت بیر یانون بولاغ اوْلسون باغ اوْلسون!
بیزدن سوْرا سنوْن باشون ساغ اوْلسون!
دوْنیا قضوْ-قدر ، اؤلوْم-ایتیمدى
دوْنیا بوْیى اوْغولسوزدى ، یئتیمدى
(٦)
حیدربابا ، یوْلوم سنَّن کج اوْلدى
عؤمروْم کئچدى ، گلممه دیم ، گئج اوْلدى
هئچ بیلمه دیم گؤزللروْن نئج اوْلدى
بیلمزیدیم دؤنگه لر وار ،  دؤنوْم وار
ایتگین لیک وار ، آیریلیق وار ، اوْلوْم وار
(٧)
حیدربابا ، ایگیت اَمَک ایتیرمز
عؤموْر کئچر ، افسوس بَرَه بیتیرمز
نامرد اوْلان عؤمرى باشا یئتیرمز
بیزد ، واللاه ، اونوتماریق سیزلرى
گؤرنمسک حلال ائدوْن بیزلرى
(٨)
حیدربابا ، میراژدر سَسلننده
کَند ایچینه سسدن - کوْیدن دوْشنده
عاشیق رستم سازین دیللندیرنده
یادوندادى نه هؤلَسَک قاچاردیم
قوشلار تکین قاناد آچیب اوچاردیم
(٩)
شنگیل آوا یوردى ، عاشیق آلماسى
گاهدان گئدوب ، اوْردا قوْناق قالماسى
داش آتماسى ، آلما ،  هیوا سالماسى
قالیب شیرین یوخى کیمین یادیمدا
اثر قویوب روحومدا ، هر زادیمدا
(١٠)
حیدربابا ، قورى گؤلوْن قازلارى
گدیکلرین سازاخ چالان سازلارى
کَت کؤشنین پاییزلارى ، یازلارى
بیر سینما پرده سى دیر گؤزوْمده
تک اوْتوروب ، سئیر ائده رم اؤزوْمده
(١١)
حیدربابا ،  قره چمن جاداسى
چْووشلارین گَلَر سسى ، صداسى
کربلیا گئدنلرین قاداسى
دوْشسون بو آج یوْلسوزلارین گؤزوْنه
تمدّونون اویدوخ یالان سؤزوْنه
(١٢)
حیدربابا ، شیطان بیزى آزدیریب
محبتى اوْرکلردن قازدیریب
قره گوْنوْن سرنوشتین یازدیریب
سالیب خلقى بیر-بیرینن جانینا
باریشیغى بلشدیریب قانینا
(١٣)
گؤز یاشینا باخان اوْلسا ، قان آخماز
انسان اوْلان بئلینه تاخماز
آمما حئییف کوْر توتدوغون بوراخماز
بهشتیمیز جهنّم اوْلماقدادیر!
ذى حجّه میز محرّم اوْلماقدادیر!
(١٤)
خزان یئلى یارپاخلارى تؤکنده
بولوت داغدان یئنیب ، کنده چؤکنده
شیخ الاسلام گؤزل سسین چکنده
نیسگیللى سؤز اوْرکلره دَیَردى
آغاشلار دا آللاها باش اَیَردى
(١٥)
داشلى بولاخ داش-قومونان دوْلماسین!
باخچالارى سارالماسین ، سوْلماسین!
اوْردان کئچن آتلى سوسوز اولماسین!
دینه : بولاخ ، خیرون اوْلسون آخارسان
افقلره خُمار-خُمار باخارسان
(١٦)
حیدر بابا ، داغین ، داشین ، سره سى
کهلیک اوْخور ، دالیسیندا فره سى
قوزولارین آغى ، بوْزى ، قره سى
بیر گئدیدیم داغ-دره لر اوزونى
اوْخویئدیم  : « چوْبان ، قیتر قوزونى »

(١٧)
حیدر بابا ، سولى یئرین دوْزوْنده
بولاخ قئنیر چاى چمنین گؤزونده
بولاغ اوْتى اوْزَر سویون اوْزوْنده
گؤزل قوشلار اوْردان گلیب ، گئچللر
خلوتلیوْب ، بولاخدان سو ایچللر
(١٨)
بىچین اوْستى ، سونبول بیچن اوْراخلار
ایله بیل کى ، زوْلفى دارار داراخلار
شکارچیلار بیلدیرچینى سوْراخلار
بیچین چیلر آیرانلارین ایچللر
بیرهوشلانیب ، سوْننان دوروب ، بیچللر
(١٩)
حیدربابا ، کندین گوْنى باتاندا
اوشاقلارون شامین ئییوب ، یاتاندا
آى بولوتدان چیخوب ، قاش-گؤز آتاندا
بیزدن ده بیر سن اوْنلارا قصّه ده
قصّه میزده چوخلى غم و غصّه ده
(٢٠)
قارى ننه گئجه ناغیل دییَنده
کوْلک قالخیب ، قاپ-باجانى دؤیَنده
قورد گئچینین شنگوْلوْسون یینده
من قاییدیب ، بیرده اوشاق اوْلئیدیم
بیر گوْل آچیب ، اوْندان سوْرا سوْلئیدیم
(٢١)
عمّه جانین بال بلله سین ییه ردیم
سوْننان دوروب ، اوْس دوْنومى گییه ردیم
باخچالاردا تیرینگَنى دییه ردیم
آى اؤزومى اوْ ازدیرن گوْنلریم!
آغاج مینیپ ، آت گزدیرن گوْنلریم!
(٢٢)
هَچى خالا چایدا پالتار یوواردى
مَمَد صادق داملارینى سوواردى
هئچ بیلمزدیک داغدى ، داشدى ، دوواردى
هریان گلدى شیلاغ آتیب ، آشاردیق
آللاه ، نه خوْش غمسیز-غمسیز یاشاردیق
(٢٣)
شیخ الاسلام مُناجاتى دییه ردى
مَشَدرحیم لبّاده نى گییه ردى
مشْدآجلى بوْز باشلارى ییه ردى
بیز خوْشودوق خیرات اوْلسون ، توْى اوْلسون
فرق ائلَمَز ، هر نوْلاجاق ، قوْى اولسون
(٢٤)
ملک نیاز ورندیلین سالاردى
آتین چاپوپ قئیقاجیدان چالاردى
قیرقى تکین گدیک باشین آلاردى
دوْلائیا قیزلار آچیپ پنجره
پنجره لرده نه گؤزل منظره!
(٢٥)
حیدربابا ، کندین توْیون توتاندا
قیز-گلینلر ، حنا-پیلته ساتاندا
بیگ گلینه دامنان آلما آتاندا
منیم ده اوْ قیزلاروندا گؤزوم وار
عاشیقلارین سازلاریندا سؤزوم وار
(٢٦)
حیدربابا ، بولاخلارین یارپیزى
بوْستانلارین گوْل بَسَرى ، قارپیزى
چرچیلرین آغ ناباتى ، ساققیزى
ایندى ده وار داماغیمدا ، داد وئرر
ایتگین گئدن گوْنلریمدن یاد وئرر
(٢٧)
بایرامیدى ، گئجه قوشى اوخوردى
آداخلى قیز ، بیگ جوْرابى توْخوردى
هرکس شالین بیر باجادان سوْخوردى
آى نه گؤزل قایدادى شال ساللاماق!
بیگ شالینا بایراملیغین باغلاماق!
(٢٨)
شال ایسته دیم منده ائوده آغلادیم
بیر شال آلیب ، تئز بئلیمه باغلادیم
غلام گیله قاشدیم ، شالى ساللادیم
فاطمه خالا منه جوراب باغلادى
خان ننه مى یادا سالیب ، آغلادى
(٢٩)
حیدربابا ، میرزَممدین باخچاسى
باخچالارین تورشا-شیرین آلچاسى
گلینلرین دوْزمه لرى ، طاخچاسى
هى دوْزوْلر گؤزلریمین رفینده
خیمه وورار خاطره لر صفینده
(٣٠)
بایرام اوْلوب ، قیزیل پالچیق اَزَللر
ناققیش ووروب ، اوتاقلارى بَزَللر
طاخچالارا دوْزمه لرى دوْزللر
قیز-گلینین فندقچاسى ، حناسى
هَوَسله نر آناسى ، قایناناسى
(٣١)
باکى چى نین سؤزى ، سوْوى ، کاغیذى
اینکلرین بولاماسى ، آغوزى
چرشنبه نین گیردکانى ، مویزى
قیزلار دییه ر : « آتیل ماتیل چرشنبه
آینا تکین بختیم آچیل چرشنبه »
(٣٢)
یومورتانى گؤیچک ، گوللى بوْیاردیق
چاققیشدیریب ، سینانلارین سوْیاردیق
اوْیناماقدان بیرجه مگر دوْیاردیق؟
على منه یاشیل آشیق وئرردى
ارضا منه نوروزگوْلى درردى
(٣٣)
نوْروز على خرمنده وَل سوْرردى
گاهدان یئنوب ، کوْلشلرى کوْرردى
داغدان دا بیر چوْبان ایتى هوْرردى
اوندا ، گؤردن ، اولاخ ایاخ ساخلادى
داغا باخیب ، قولاخلارین شاخلادى
(٣٤)
آخشام باشى ناخیرینان گلنده
قوْدوخلارى چکیب ، وورادیق بنده
ناخیر گئچیب ، گئدیب ، یئتنده کنده
حیوانلارى چیلپاق مینیب ، قوْواردیق
سؤز چیخسایدى ، سینه گریب ، سوْواردیق
(٣٥)
یاز گئجه سى چایدا سولار شاریلدار
داش-قَیه لر سئلده آشیب خاریلدار
قارانلیقدا قوردون گؤزى پاریلدار
ایتر ، گؤردوْن ، قوردى سئچیب ، اولاشدى
قورددا ، گؤردوْن ، قالخیب ، گدیکدن آشدى
(٣٦)
قیش گئجه سى طؤله لرین اوْتاغى
کتلیلرین اوْتوراغى ، یاتاغى
بوخاریدا یانار اوْتون یاناغى
شبچره سى ، گیردکانى ، ایده سى
کنده باسار گوْلوْب - دانیشماق سسى
(٣٧)
شجاع خال اوْغلونون باکى سوْقتى
دامدا قوران سماوارى ، صحبتى
یادیمدادى شسلى قدى ، قامتى
جؤنممه گین توْیى دؤندى ، یاس اوْلدى
ننه قیزین بخت آیناسى کاس اوْلدى
(٣٨)
حیدربابا ، ننه قیزین گؤزلرى
رخشنده نین شیرین-شیرین سؤزلرى
ترکى دئدیم اوْخوسونلار اؤزلرى
بیلسینلر کى ، آدام گئدر ، آد قالار
یاخشى-پیسدن آغیزدا بیر داد قالار
(٣٩)
یاز قاباغى گوْن گوْنئیى دؤیَنده
کند اوشاغى قار گوْلله سین سؤیَنده
کوْرکچى لر داغدا کوْرک زوْیَنده
منیم روحوم ، ایله بیلوْن اوْردادور
کهلیک کیمین باتیب ، قالیب ، قاردادور
(٤٠)
قارى ننه اوزاداندا ایشینى
گوْن بولوتدا اَییرردى تشینى
قورد قوْجالیب ، چکدیرنده دیشینى
سوْرى قالخیب ، دوْلائیدان آشاردى
بایدالارین سوْتى آشیب ، داشاردى
(٤١)
خجّه سلطان عمّه دیشین قیساردى
ملا باقر عم اوغلى تئز میساردى
تندیر یانیب ، توْسسى ائوى باساردى
چایدانیمیز ارسین اوْسته قایناردى
قوْورقامیز ساج ایچینده اوْیناردى
(٤٢)
بوْستان پوْزوب ، گتیرردیک آشاغى
دوْلدوریردیق ائوده تاختا-طاباغى
تندیرلرده پیشیرردیک قاباغى
اؤزوْن ئییوْب ، توخوملارین چیتداردیق
چوْخ یئمکدن ، لاپ آز قالا چاتداردیق
(٤٣)
ورزغان نان آرموت ساتان گلنده
اوشاقلارین سسى دوْشردى کنده
بیزده بویاننان ائشیدیب ، بیلنده
شیللاق آتیب ، بیر قیشقریق سالاردیق
بوغدا وئریب ، آرموتلاردان آلاردیق
(٤٤)
میرزاتاغى نان گئجه گئتدیک چایا
من باخیرام سئلده بوْغولموش آیا
بیردن ایشیق دوْشدى اوْتاى باخچایا
اى واى دئدیک قورددى ، قئیتدیک قاشدیق
هئچ بیلمه دیک نه وقت کوْللوکدن آشدیق
(٤٥)
حیدربابا ، آغاجلارون اوجالدى
آمما حئییف ، جوانلارون قوْجالدى
توْخلیلارون آریخلییب ، آجالدى
کؤلگه دؤندى ، گوْن باتدى ، قاش قَرَلدى
قوردون گؤزى قارانلیقدا بَرَلدى
(٤٦)
ائشیتمیشم یانیر آللاه چیراغى
دایر اوْلوب مسجدیزوْن بولاغى
راحت اوْلوب کندین ائوى ، اوشاغى
منصورخانین الی-قوْلى وار اوْلسون
هاردا قالسا ، آللاه اوْنا یار اوْلسون
(٤٧)
حیدربابا ، ملا ابراهیم وار ، یا یوْخ؟
مکتب آچار ، اوْخور اوشاقلار ، یا یوْخ؟
خرمن اوْستى مکتبى باغلار ،  یا یوْخ؟
مندن آخوندا یتیررسن سلام
ادبلى بیر سلامِ مالاکلام
(٤٨)
خجّه سلطان عمّه گئدیب تبریزه
آمما ، نه تبریز ، کى گلممیر بیزه
بالام ، دورون قوْیاخ گئداخ ائممیزه
آقا اؤلدى ، تو فاقیمیز داغیلدى
قوْیون اوْلان ، یاد گئدوْبَن ساغیلدى
(٤٩)
حیدربابا ، دوْنیا یالان دوْنیادى
سلیماننان ، نوحدان قالان دوْنیادى
اوغول دوْغان ، درده سالان دوْنیادى
هر کیمسَیه هر نه وئریب ، آلیبدى
افلاطوننان بیر قورى آد قالیبدى
(٥٠)
حیدربابا ، یار و یولداش دؤندوْلر
بیر-بیر منى چؤلده قوْیوب ، چؤندوْلر
چشمه لریم ، چیراخلاریم ، سؤندوْلر
یامان یئرده گؤن دؤندى ، آخشام اوْلدى
دوْنیا منه خرابه شام اوْلدى
(٥١)
عم اوْغلینان گئدن گئجه قیپچاغا
آى کى چیخدى ، آتلار گلدى اوْیناغا
دیرماشیردیق ، داغلان آشیردیق داغا
مش ممى خان گؤى آتینى اوْیناتدى
تفنگینى آشیردى ، شاققیلداتدى
(٥٢)
حیدربابا ، قره کوْلون دره سى
خشگنابین یوْلى ، بندى ، بره سى
اوْردا دوْشَر چیل کهلیگین فره سى
اوْردان گئچر یوردوموزون اؤزوْنه
بیزده گئچک یوردوموزون سؤزوْنه
(٥٣)
خشگنابى یامان گوْنه کیم سالیب؟
سیدلردن کیم قیریلیب ، کیم قالیب؟
آمیرغفار دام-داشینى کیم آلیب؟
بولاخ گنه گلیب ، گؤلى دوْلدورور؟
یاقورویوب ، باخچالارى سوْلدورور؟
(٥٤)
آمیر غفار سیدلرین تاجییدى
شاهلار شکار ائتمه سى قیقاجییدى
مَرده شیرین ، نامرده چوْخ آجییدى
مظلوملارین حقّى اوْسته اَسَردى
ظالم لرى قیلیش تکین کَسَردى
(٥٥)
میر مصطفا دایى ، اوجابوْى بابا
هیکللى ،ساققاللى ، توْلستوْى بابا
ائیلردى یاس مجلسینى توْى بابا
خشگنابین آبروسى ، اَردَمى
مسجدلرین ، مجلسلرین گؤرکَمى
(٥٦)
مجدالسّادات گوْلردى باغلارکیمى
گوْروْلدردى بولوتلى داغلارکیمى
سؤز آغزیندا اریردى یاغلارکیمى
آلنى آچیق ، یاخشى درین قاناردى
یاشیل گؤزلر چیراغ تکین یاناردى
(٥٧)
منیم آتام سفره لى بیر کیشییدى
ائل الیندن توتماق اوْنون ایشییدى
گؤزللرین آخره قالمیشییدى
اوْننان سوْرا دؤنرگه لر دؤنوْبلر
محبّتین چیراخلارى سؤنوْبلر
(٥٨)
میرصالحین دلى سوْلوق ائتمه سى
میر عزیزین شیرین شاخسِى گئتمه سى
میرممّدین قورولماسى ، بیتمه سى
ایندى دئسک ، احوالاتدى ، ناغیلدى
گئچدى ، گئتدى ، ایتدى ، باتدى ، داغیلدى
(٥٩)
میر عبدوْلوْن آیناداقاش یاخماسى
جؤجیلریندن قاشینین آخماسى
بوْیلانماسى ، دام-دوواردان باخماسى
شاه عبّاسین دوْربوْنى ، یادش بخیر!
خشگنابین خوْش گوْنى ، یادش بخیر!
(٦٠)
ستاره عمّه نزیک لرى یاپاردى
میرقادر ده ، هر دم بیرین قاپاردى
قاپیپ ، یئیوْب ، دایچاتکین چاپاردى
گوْلمه لیدى اوْنون نزیک قاپپاسى
عمّه مینده ارسینینین شاپپاسى
(٦١)
حیدربابا ، آمیر حیدر نئینیوْر؟
یقین گنه سماوارى قئینیوْر
داى قوْجالیب ، آلت انگینن چئینیوْر
قولاخ باتیب ، گؤزى گیریب قاشینا
یازیق عمّه ، هاوا گلیب باشینا
(٦٢)
خانم عمّه میرعبدوْلوْن سؤزوْنى
ائشیدنده ، ایه ر آغز-گؤزوْنى
مَلْکامِدا وئرر اوْنون اؤزوْنى
دعوالارین شوخلوغیلان قاتاللار
اتى یئیوْب ، باشى آتیب ، یاتاللار
(٦٣)
فضّه خانم خشگنابین گوْلییدى
آمیریحیا عمقزینون قولییدى
رُخساره آرتیستیدى ، سؤگوْلییدى
سیّد حسین ، میر صالحى یانسیلار
آمیرجعفر غیرتلى دیر ، قان سالار
(٦٤)
سحر تئزدن ناخیرچیلار گَلَردى
قوْیون-قوزى دام باجادا مَلَردى
عمّه جانیم کؤرپه لرین بَلَردى
تندیرلرین قوْزاناردى توْسیسى
چؤرکلرین گؤزل اییى ، ایسیسى
(٦٥)
گؤیرچینلر دسته قالخیب ، اوچاللار
گوْن ساچاندا ، قیزیل پرده آچاللار
قیزیل پرده آچیب ، ییغیب ، قاچاللار
گوْن اوجالیب ، آرتارداغین جلالى
طبیعتین جوانلانار جمالى
(٦٦)
حیدربابا ، قارلى داغلار آشاندا
گئجه کروان یوْلون آزیب ، چاشاندا
من هارداسام ، تهراندا یا کاشاندا
اوزاقلاردان گؤزوم سئچر اوْنلارى
خیال گلیب ، آشیب ، گئچر اوْنلارى
(٦٧)
بیر چیخئیدیم دام قیه نین داشینا
بیر باخئیدیم گئچمیشینه ، یاشینا
بیر گورئیدیم نه لر گلمیش باشینا
منده اْونون قارلاریلان آغلاردیم
قیش دوْندوران اوْرکلرى داغلاردیم
(٦٨)
حیدربابا ، گوْل غنچه سى خنداندى
آمما حئیف ، اوْرک غذاسى قاندى
زندگانلیق بیر قارانلیق زینداندى
بو زیندانین دربچه سین آچان یوْخ
بو دارلیقدان بیرقورتولوب ، قاچان یوْخ
(٦٩)
حیدربابا گؤیلر بوْتوْن دوماندى
گونلریمیز بیر-بیریندن یاماندى
بیر-بیروْزدن آیریلمایون ، آماندى
یاخشیلیغى الیمیزدن آلیبلار
یاخشى بیزى یامان گوْنه سالیبلار
(٧٠)
بیر سوْروشون بو قارقینمیش فلکدن
نه ایستیوْر بو قوردوغى کلکدن؟
دینه گئچیرت اولدوزلارى الکدن
قوْى تؤکوْلسوْن ، بو یئر اوْزى داغیلسین
بو شیطانلیق قورقوسى بیر ییغیلسین
(٧١)
بیر اوچئیدیم بو چیرپینان یئلینن
باغلاشئیدیم داغدان آشان سئلینن
آغلاشئیدیم اوزاق دوْشَن ائلینن
بیر گؤرئیدیم آیریلیغى کیم سالدى
اؤلکه میزده کیم قیریلدى ، کیم قالدى
(٧٢)
من سنون تک داغا سالدیم نَفَسى
سنده قئیتر ، گوْیلره سال بوسَسى
بایقوشوندا دار اوْلماسین قفسى
بوردا بیر شئر داردا قالیب ، باغیریر
مروّت سیز انسانلارى چاغیریر
(٧٣)
حیدربابا ، غیرت قانون قاینارکن
قره قوشلار سنَّن قوْپوپ ، قالخارکن
اوْ سیلدیریم داشلارینان اوْینارکن
قوْزان ، منیم همّتیمى اوْردا گؤر
اوردان اَییل ، قامتیمى داردا گؤر
(٧٤)
حیدربابا . گئجه دورنا گئچنده
کوْراوْغلونون گؤزى قارا سئچنده
قیر آتینى مینیب ، کسیب ، بیچنده
منده بوردان تئز مطلبه چاتمارام
ایوز گلیب ، چاتمیونجان یاتمارام
(٧٥)
حیدربابا ، مرد اوْغوللار دوْغگینان
نامردلرین بورونلارین اوْغگینان
گدیکلرده قوردلارى توت ، بوْغگینان
قوْى قوزولار آیین-شایین اوْتلاسین
قوْیونلارون قویروقلارین قاتلاسین
(٧٦)
حیدربابا ، سنوْن گؤیلوْن شاد اوْلسون
دوْنیا وارکن ، آغزون دوْلى داد اوْلسون
سنَّن گئچن تانیش اوْلسون ، یاد اوْلسون
دینه منیم شاعر اوْغلوم شهریار
بیر عمر دوْر غم اوْستوْنه غم قالار

ایکنجی « حیدر بابایا سلام »

(77)
حیدر بابا، گلدیم سنی یوخلیام،
بیرده یاتام ، قوجاغوندا یوخلیام،
عمری قووام، بلکه بوردا حاخلیام،
اوشاقلیغا دیه م ، بیزه گلسن بیر!
آیدین گونلر، آغلاراوزه گولسن بیر.
(78)
حیدربابا، چکدون منی گتیردون،
یوردوموز-یووا میزا ایئتردون،
یوسفوی اوشاقیکن ایتیردون،
قوجا یعقوب، ایتمیشسده، تاپوبسان
قووالیوب، قورد آغریندان قاپوبسان!
(79)
بوردا دوشن کروان چاتوب، کو چوبدی،
آیریلیغین شربتینی ایچوبدی،
عمرموزون کوچی بوردان کوچوبدی،
کوچوب گئدوب، گئدرگلمز یوللارا،
توزی قونوب بوداشلارا،کوللارا!
(80)
بوردا شیرین خاطره لر یاتوبلار،
داشلاریان باشی-باشا چاتوبلار،
آشنالیغین داشین بیردن آتوبلار،
من باخاندا، قاوزانیللار، باخیللار،
بیرده یاتوب، یاندیریللار، یاخیللار.
(81)
گئدنلرین یری بوردا گورونور،
(خانم ننه م ) آغ کفنین بورونور،
دالیمجادور، هاراگئدم سورونور،
بالا گلدون، نیه بیله گژ گلدون،
صبریم سنن گولشدی، سن گوژ گلدون.
(82)
قبیله میز بوردا قوروب اوجاغی،
ایندی اولموش قورد قوشلارین یاتاغی،
گون باتاندا، سونر بوتون چراغی،
و بلدة لیس لها انیس،
الاالیعافیر و الا العیس ،
(83)
روزگارین دگیرمانی فیر لانیر،
مخلوق اونون دیشلرینه توللانیر،
باخ که، بشر گنه نئجه آللانیر:
همیشه لیک شادلیق اومور ئوزونه،
قبری گورور، توزقوندورمور اوزونه.
(84)
کهنه لرین سور-سوموگی دار تیلوب،
قورتولانین چول-چوخاسی ییر تیلوب،
(ملا ابراهیم) لاپ ارییوب، قورتولوب،
(شیخ الاسلام) ،سهمان قالیب، قیوراخدی،
نوروزعلی، قاچاق گچیب، قوچاقدی!
(85)
آهیللارون، یتمیش کفن چورودوب،
جاهیللاری دنیا غمی کیریدوب،
قیز گلین لر، ات-جانلارین اریدوب،
(رخشنده نین) نوه دوتور الینی،
(ننه قیزین) کوره کنی- گلینی.
(86)
چوخ شکروار،گنه گلدوخ گوروشدوخ،
ایتنلردن، بیتنلردن سوروشدوخ ،
کوسموشدوخ دا، آللاه قویسا، باریشدوخ،
بیرده گوروش قسمت اولا، اولمایا،
عمرلرده فرصت اولا، اولمایا.
(87)
بوداملاردا چوخلی جیزیخ آتمیشام،
اوشاقلارین آشیقلارین اوتموشام،
قورقوشوملی سققه آلیب- ساتمیشام،
اوشاق نئجه هچ زادینان شاد اولار!
ایندی بیزیم غمی دوتمور دنیالار.
(88)
بو طوله ده ساری  اینک دوغاردی،
خانم ننه م اینکلری ساغاردی،
آنا اییسی دام – دوواردان یاغاردی،
من بزووی قوجاخلاردیمریا، قاچماسین،
دییه ردی:باخ، بایدا دولسون داشماسین.
(89)
بوردا خیال میدانلاری گنیش دی،
داغلار-داشلار بوتون مننن تانیشدی،
گورجک منی، حیدبابا دانیشدی:
بونه سسدی،سن عالمه سالوبسان!
گل بیر گورک ئوزون هاردا قالوبسان؟
(90)
کجاویله بو چایدان چوخ گچمیشیک
بو چشمه دن سرین سولار ایچمیشیک،
بو یونجالیقلاردا اکیپ بیچمیشیک،
چپیشلری قیدیخلیان گونلریم؛
چیپش کیمی اویناخلیان گونلریم!
(91)
خانم ننه م ناخوش اولان ایلیدی،
قیش وارایکن کولک ایدی،یئل  ایدی،
قیش داچیخدی، یاغیشیدی، سئلیدی،
یوک-یاپینی هی چاتیردوق که گئداخ!
سئل کوشگورور، مجبور اولدوخ قییداخ.
(92)
نیسان دوشدی،بیزده دوشدوخ یاغیشا،
هی دییردوخ، بلکه یاغیش ییغیشا،
کیم باشاریر سئللرینن بوغوشا؟!
(بالا کیشی) ، فایتونچی میز گلمیشدی!
(اما میه )ذقهوه سینده قالمیششدی.
(93)
بو خرمنده«آردان خیر» اوینار دوخ،
جومالاشیب،قاریشقاتک قایناردوخ،
یواش-یواش باغچالارا آغناردوخ،
آغاشلاردان چلینک آغاج کسردوخ،
قوروقچونون قورخوسسیندان اسردوخ!
(94)
بو باغچادا آش تره سی اکردیک،
هی سو آچیپ، کردییه گوزتیکردیک،
چیخماق همین دریب، آشا توکردیک.
فینتلیش لر قاشیقلاردان آسلانی!
یاغلی دئسه م ، قوری آغزون ایسلانی!
(95)
مکتب قالیر، اوشاقلار درس آلیللار،
هی یازیللار، هی پوزیللار، یالیللار!
( ملا ابراهیم)، ئوزی-ائوی قالیللار،
اما بیزیم یولداشلاردان قالان یوخ!
بونلاردان بیر بیزی یاداسالان یوخ!
(96)
بو مکتبده، شعرین شهدین دادمیشام،
آخوندون آغزیندان قاپوب، اودموشام،
گاهدان دابیر،  آخوندی آللاتمیشام،
باشیم آغریردییوب،قاچیپ گتمیشم!
باغچالاردا گئدیب، گوزدن ایتمیشم!
(97)
آزاد اولاندا، مکتبدن چیخاردیق،
هجوملا بیر- بیریمیزی سیخاردیق،
یولدا هرنه گلدی، ووروبییخاردیق،
اوشاق دئمه، ایپین قیرمیش دانادئه!
بیردانا دا دئمه، اوتوزا دانا دئه!
(98)
دئدیم: بالام،(اوممدسن) نولوبدی؟
معلوم اولان، طفیل بالا ئولوبدی؟
نه وار، نه وار، بورنوندان قان گلوبدی،
بیر یئل اسیر، باخیرسان(ممدسن)یوخ،
بوکتده بیر بورون قانی کسه ن یوخ؟
(99)
(ملک نیاز)، ایتگین گئدیب یوخ اولوب.
(میراصلان خان)، سکته ائدیب ییخلوب.
هرکس سینوب بیردمکده سیخیلوب،
چورک غمی چیخوب خلقین آیینا!
هره قالیب ئوز جاننین هایینا!
(100)
کتدی یازیق چراغ تاپمیر یاندیرا،
گوروم سیزون برقوز قالسین آندیرا،
کیم بوسوزی اربابلارا قاندیرا،
نه دور آخر بو ملتین گناهی،
توتسون، گوروم، سیزی مظلوملار آهی!
(101)
هرنه آلار، باهاوئرر قیمتی،
اوجوز-فقط اکینچنین زحمتی ،
بیته نینن آرتیق بیچه نینین اجرتی ،
کند اوشاغی گئدیر یولدا ایشلیه
اوردا، بلکه، قندی تاپا دیشلیه!
(102)
کتدی گلین کیمی دنیانی بزه ر،
ئوز عورتی یاماق – یاماقا دوزه ر،
اینه بزه ر خلقی، ئوزی لوت گزه ر،
ایندی ده وار چارشابلاری آلباقدی!
اوشاقلارین قیش- پاچاسی چیلپاقدی!
(103)
خلورچیلر بوردا خلور داشیردی.
بوکوللوکدن اولاخلاردیر ماشیردی.
سئللر کیمی، نعمت آشوب – داشیردی.
هرایش دئدون، هرکیمسییه گورردی،
جان درمانی ایسته سیدون، وئرردی.
(104)
ایندی بشر آژقود تکین اودوخوب،
چومبلنتی گوزقیجیر دوب، دوروخوب.
باخیللارکی گورسونلر کیم سینیخوب،
توکولسونلر، اونون لشین یرتسین لار!
هره بیر دیش انسه سینه قیرتسین لار!
(105)
بودوشلرده، قوزولاری یا یاردوق!
آخماسینلار، اولدوزتکین سایاردوق!
قوش قووانی چکیب داشا دایاردوق!
قوش قووان دا ایله بیل کی قاباندی!
قورد، اوزاقدان دییر بس کی چوباندی.
(106)
بوزه میده گئدوب گوزدن ایتردیک،
تونقال قوروب، سوتوللری اوتردیک!
دییوب – گولمک مرادینا یتردیک!
ائل ده گولسون، مرادینا یتیشسون!
اورکلرین یارالاری بیتیشسون!
(107)
حیدر بابا، سنده دفینه لر وار،
داغلار ودیعه سی خزینه لر وار،
آما سنه بنزه ر ده سینه لر وار،
بو سینه لر داغلار ایله دانیشیر،
داغلار کیمی گوگلر ایله قونوشیر.
(108)
گور هاردان من سنه سالدیم نفسی،
دئدیم قایتار سال عالمه بو سسی،
سن ده یاخشی سیمرغ ائتدین مگسی،
سانکی قاناد وئردین یئله، نسیمه،
هر طرفدن سسس وئردیلر سسیمه.
(109)
حیدر بابا، سنی وطن بیلمیشدیم،
وطن دییب، باش گوتوروب گلمیشدیم،
سنی گوروب گوز یاشیمی سیلمیشدیم،
حالبوکی لاپ غملی غربت سنده ایمیش،
قارا زندان، آجی شربت سنده ایمیش.
(110)
کیم قالدی که، بیزه بوغون بورمادی،
آلتدان – آلتدان بیزه کلک قورمادی،
بیر مرد اوغوال بیزه هاوار درمادی،
شیطانلاری قوجا قلاییب، گزدیز سیز،
انسانلاری آیا قلاییب ازدیز سیز.
(111)
دیوار اوجالدی ، گون بیزه دوشمه دی،
زندان قرالدی، گوزوسئچمه دی ،
گوندوز گوزی منیم لامپام کئچمه دی ،
سئلده باسدی، اممیزدولوب گول اولدی،
چوخ یازیغین ائوی چونوب چول اولدی.
(112)
اول باشی مندن استقبال ائتدیز،
سوندان چونوب ایشمیده اخلال ائتدیز،
ئوز ظنیزجه استادی اغفال ائتدیز،
عیبی یوخدیر، کئچر گئدر، عمردور،
قیش دا چیخار، اوزوقارا کومور دور.
(113)
منیم یولوم محبت جاده سیدی،
سون سوزلریم حقین اراده سیدی،
محبتین رسالت وعده سیدی،
یوخسا منده بیرکس ایله غرض یوخ،
سیاست آدلی منده بیر مرض یوخ.
(114)
حق نه دییر؟ کفره قارشی گئتمه یز.
نوردان چیخیب ظلمت ایچره ایتمه یز،
فیریلداغاا فرفراتک بیته یز،
گوردوزدهکی اولمادی کفرین دیبی،
پول دا وئرسه،  آلماغاتیکمیش جیبی.
(115)
شیطان بیزیم قبله میزی چوندروب،
آللاه دیین یولدان بیزی دوندروب،
ایلانلی چشمه یه بیزی گوندروب،
منت قویورکی آرخنیز نهر اولوب،
بیز گورورک سولار بیزه زهر اولوب.
(116)
حیدر بابا، گیلئی لیکدن نه چیخار؟
ظلمون  ائوین صبر و تحمل ییخار،
درویش اولان صبرین الین برک سیخار،
گل قاییداق، چیخاق آقا دوزونه،
کئچه ک گنه محبتین سوزونه.
(117)
دینه اوشاق بیر – بیریله ساز اولسون،
بلکه بوقیش بیرده چونوب یاز اولسون،
چای چمنلر اوردک اولسون، قاز اولسون،
بیزده باخیب فرحله نیب بیر اوچاق،
سنیق – سالخاق قانادلاری بیر آچاق.
(118)
بو باخچادان آلچالاری درردیک،
قیش آدینا چیخییب دامدا سرردیک
هی ده چخیب یالاندان چوندرردیک،
قیش زومارین یایدا یه ییب دویاردیق
بیر کلی ده منت خلقه قویاردیق.
(119)
ائولرقالیر، ائو صاحبی یوخ ئوزی
اوجاقلارین آنجاق ایشیلدیر گوزی،
گئدنلرین آز – چوخ قالیبدیر سوزی،
بیزدن ده بیر سوز قالاجاق ، آی امان!
کیملر بیزدن سوز سالاجاق، آی امان!
(120)
بیزدن سونرا کرسی لرین تووندا،
کندین ناغیلاریندا، سوز_ سووندا،
قاری ننه نین چاخما غیندا،قووندا،
حیدر بابا ئوزون قاتار سوزلره،
ایچگی کیمی خمار وئره ر گوزلره.
(121)
عاشیق دئیه ر : بیر نازلی یار وارایمیش،
عشقیندن اودلانیب یانار وارایمیش،
بیر سازلی – سوزلی شهریار ووارایمیش،
اودلار سونوب، اونون اودی سونمه ییب،
فلک چونوب، اونون چرخی چونمه ییب.
(122)
حیدربابا آلچاقلارون کوشک اولسون
بیزدن سورا، قانلارا عشق اولسون،
گچمیشلردن، گلنلره مشق اولسون،
اولادیمیز، مذهبنی دانماسین!
هرایچی بوش سوزلره آللانماسین