بسله نیر قلبیمده سونسوز حورمت، آزربایجانا
ایسته رم دونیاده من حوریت آزربایجانا
سانمایین اوز یوردومون اسرارینا بیگانه یم
من اونون سودای عشقیندن بوجور دیوانه یم
شمعه بنزر، دوره سینده فیرلانان پروانه یم
قویمارام اصلا قویولسون منت آزربایجانا
شاعیرم بیر بولبولم من، آشیانئمدیر وطن
سئیرگاهیم دیر افقلر، خوابگاهیم دیر چمن
چولده بیتمیش لاله لر، داغلاردا آچمیش یاسمن
هر بیری وئرمیش یئنه بیر زینت آزربایجانا
بیر گوزلدیر سئودیگیم کی، حسنونون حیرانیام
من اونا تعریف یازان شاعیرلرین قوربانییام
بیلمیرم صوفی پرستم، عارفم، روحانئیه م
قائلم معناده من، بیر قیمت آزربایجانا
من خیانت ائتمه دیم مرحوم اولان اجدادیما
ارث تک وئردیم بو یوردو، قهرمان اولادیما
حفظ ائدیب بو اولکه نی، باش اگمه سین جلادیما
اونلارین آوازی وئرسین، شهرت آزربایجانا
پایدار اولسون گوروم اودلو آلاولار تورپاغی
دالغالانسین شانلی بورجوندا عدالت بایراغی
قصردن خوشدور منه هر داخماسی، هر چارداغی
بسله نیر قلبیمده سونسوز حرمت آزربایجانا

محمد بی ریا 

آردینی اوخو
جمعه 28 دی 1397
بؤلوملر : محمد بی ریا ,