آتا – آنا قویان آدیم «رجب» شهرتیم «ابراهیمی کورعباسلو» چاغیریلیب .  شعرده تخلصوم« فرهاد»  و  یا«ر . ا. فرهاد » اولوبدور . 1314- جی ایلین آبان آیینین 15 اردبیلین «یورتچی » ماحالینین «کورابازلی » کندیندن آنادان اولوب کند حیاتیندا گوز آچیب کند یاشاییشینا گوره ، داغلار ، کوشن لر ، آران یایلاق لاردا طبیعت و حیات ایله تانیش اولوب بوی آتمیشام  .

اون یاشیم باشا چاتمادان 1324 جی ایلین شهریور آییندا  عائلم ایله برابر «کورابازلی » دان تهرانا کوچموشوک .  

دونیانین ایکینجی محاربه سینده قورتاران چاغلاریندا ایراندا   رضا شاه قاچمیش و اونون دیکتاتور لوغو موقت بیر حالدا ،     اوز یئرینی بیر اوترگی آزادلیغا ورمیشدی .

ائله لیکله ایرانین بوتون شهرلرینده خصوصا تهراندا موختلیف کوتله وی حزکت لر باشلانمیشدی و من ده «تزه توره مه » جوانلیق شرایطینده اولاراق بو حرکت لره گوز تیکیب حیرتلی  بیر حالدا بویا –یاشا دولوردوم ، عین حالدا او حرکت لر اوز تاثیراتین منیمحیاتیم ده قویار کن ، دونیا باخیشیم و فیکر فورمالاریما شکیل وئریب دویغولاریمی جانلاندیردی .

من یاشا دولدوقجا جورو به جور یوللار آیریجیندا قرار دوتوب موختلیف مقصد لره دعوت اولدوم  آنجاق او چاغیریشلار آراسیندا منیم آنا یوردومون ، آغیر دردلری و چتین لیک لری  منده آرتیق اثر قویار کن منی بیر «ظالیم – مظلوم » ساواشینا یوللاندیریردی ، حال بو کی من بر الی یالین ، ساده و یالقیز اینسان اوزلوگومده نه ائده بیلردیم ؟!   .

ائله لیک له تکجه اومیدیم «قلم – کاغیذا» گلیب کی اونلارین وسیله سی ایله آزاراق بیلیکو سواد سایه سینده ( اورادان کی بیزیم کورابازلینین دیلی ، آذربایجانین ادبی دیلینه یاخین اولدوغونا و هابئلهاوشاقلیق دورونده اویرندیگیم ناغیلاردان شعرلردن کومک آلیب ) بعضی خلافکار آداملاری و بعضا باش وئرن ایرنج ایش لری شعریله لاغا قویوب باغلامالار و بایاتیلار فورماسیندا ساتریکا (طنز) اوسلوبی ایله «قوشمالار » قوشوب دوستلار – یولداشلار اوخویوب اونلارین طرف لرینده تشویق اولوردیم   بو زاماندا آذربایجانین دئیرلی بیر ادیبی «علی تبریزی » ایله یاخیندان تانیش اولماغیم منده بویوک بیر دئیشیلیک یارادیب منی بیر نئچه ادیب و اردملی یازیچی – شاعیر (اوجمله دن مرحوم اعتماد ناطقی وساوالان و ..)جمعینده قرار وئردی کی بو تانشلیقلار منیم روحیمده اولمز بیر اثر قویار کن جدی صورتده منده آنا دیلینده یازماغا داها آرتیق رغبت یاراتدی  تا بو کی سونرالار بیر اردملی موسیقی خادمی _رحمتلیکاوستاد علی سلیمی ایله ) گوروشمه گیم باعث اولدی ایکی دردلی کیمی بیر –بیریمزله یاناشیب ایل لر بویو «ماهنی » سویّه سینده ایشله ییب همکارلیق ائله یک و بوهمکارلیغیمیز، ایران رادیوسیندا آزربایجانین بویوک ارکستر اعضاسینین یاردیمی ایله حیاته گئچدی ( چونکی ماهنی ائلین گونده لیک دیلی کیمین ساده اولدوقدا ائلین آرزو دیلک لرینی اوزونده داشئیار کن قالارگی بیر وسیله اولوب ، موسیقی نغمه سی و مغنی نین خوش سسیله قووشوب گاها اولمز بیر اثر یا خاطیریه چئوریلیر ) نئجه کی «آیریلیق » ماهنی سی موسیقی دونیاسیندا بیر یگانه اثر دیلدن دیل لره دوشر کن آزربایجان خلقینین شاه اثرلریندن بیری ساییلیر البته «آیریلیق » ماهنی سینین دونیا بویو شوهرت تاپیب یاییلماسینا باعث (شعر وموسیقی سندن علاوه ) بیری ده آزربایجانین قودرتلی – شوهرتلی موغنی سی «رشید بهبودوف » رحمت لئیین اجراسی اولوب (کی پهلوی دورونده ایراندا ایکینجی سفرینده ) بو ماهنی بیر نئچه ماهنی ایله برابر ، قودرتلی خواننده یه تقدیم اولوندو و او باکی یا قاییداندان سونرا بویوک ارکستر ایله اولونماسینی 48 دورگرامافون صفحه سینده دولدوروب ، شاعر و بسته کارین آدین قئید ائده رک بیزه گوندردی و اوندان سونرا آزربایجانین ایرانداکی آدلیم خواننده سی « قوقوش خانیم » وسیله سی ایله اجرا ائله ده اجرا اولونماسی «آیریلیق » ماهنی سینی سر حد لردن گئچیرتدی . 

حال بو کی یوزه یاخین موختلیف «آدلار » و «عنوانلار » ایله ماهنی لار یازمیشام تاسف کی او شرایط ده دیری اجرا اولدوقدا اونلارین بیر حیصه سی الده قالمیبدیر اینقلابین حقینده و اینقلابدان سونرادا (خصوصا موقدس 8 ایل لیک  وطن دفاع سیندا )دویوشچولریمیزین وصیفنده بیر سیرا «سرود » لار یازمیشام کی اوز وقتینده رادیو  تئلویزیوندا ایجرا اولونوبدور ( اوجمله دن عسگرین آناسیله  وداع سی ، شاهین لریم ، جهاد وقتی دیر ، ایش وقتی دیر و ....) و هابئله خلقین ، اجتماعی دردلرینه دائر و یا وطن پرور لیک و طبیعت وصفینده غزل و یا سربست شعرلر یازیب و یا «تهراندا کی آزربایجان یازیچی – شاعیرلر جمعیتی  نین » مدیریتنده اولماقا «ادبی یارپاقلار » و «گونش » مجموعه سینین نشرینده ایشتراک ائده رک ادبی فعالیتمه دوام وئریب و هله ده هر فرصتده امکان اولدوغو قدر داوام وئره جئگم .                                                     آنجاق بو آرادا 40 ایلدن بری منیم چوخلو وقتیمو امکاناتیم «بلکه ده بوتون وارلیغیم » وطن پرور لیک احساسی اساسیندا آنایوردومدا «عام المنفعه » عمرانی ایشلریه صرف اولاراق و هله ده اولماقدادیر ! بو 40 ایلده گئجه – گوندوز امانسیز چالیشار کن کوچریلیک (مهاجرت ) اثرینده بوشالیب خرابه قالمیش بو کندی (کورابازلینی ) تزه دن آباد ائله یب ، بیر آبادلیق نمونه سینه چئویرمیشیک                                       یئری گلمیش کن دئمه لئیم کی بو ایشده آتا – بابالاردان قالان مثل دئییلن کیمی ائل گوجو –سئل گوجوندن حساب اولونموش صورتده فایدالاناراق   ، تهراندا یا اوزگه شهرلرده یاشایان کواربازلی لارین «جانانه » کومک لیک لریندن چوخلو استفاده ائله ییب او کندی آزربایجانلی اینسان لارین وطن پرورلیک و آبادلیق سئور احساسلارینین نمونه سی  کیمین (عمران و آبادانی ساحه ده ) نمایشه قویوب تانیتدیرمیشیق                  اودورکی کورابازلینین آبادلیغی سبب اولوب ، بوتون «یورتچو » محالی نین کندلری بیر یاریش (مسابقه ) عرصه سینده ایشتراک ائدیب گوندن – گونه ، آبادلیغا چئورلیب (کوچن قوشلار یووالارینا قاییدان کیمی ) اوکندلرین اهالی سی شهرلردن گلیب آتا –بابا یوردلارینی آباد ائله مئگه باشلاسینلار .              و «کورابازلی » بو آرادا هله ده بیر گورکملی نمونه کیمی ، آذربایجانین ماوی بولودلو گوی لرینده پارلاق اولدوز کیمی نور ساچمادادیر، آرتیلمالئیام  کی بو ماهنین دونیادا بویوک شوهرت قازانماسینا رحمتلیک رشید بهبودوف آزربایجانینی گورکملی موغنی سینین اجرا ائتدیگی دیر کی دونیا عرصه سینده اوزونه بویوک یئر آچیب و دیللرده ازبر اولماسیدیر.