خزان اولجاق سوسار بولبول ولی بستاندان آیریلماز
اؤزو ساکت  اولورسا ، فطرتی  داستاندان  آیریلماز
منه  غربت  بهشت  اولسا ، نهایتده  غریبم  من
آنایورد قایغیسی، هئچوقت آییق وجداندان آیریلماز
وفانی، ظلم ایله سورگون دوشن یوسف دن اؤیرندیم
اؤزو قول تک ساتیلمیشسا، اوره ک کنعاندان آیریلماز
بلادان جان  قاچیرماز عهدینه  ثابت  قالان  عاشق
آدی اوستونده دیر، طوفان قوشو طوفاندان آیریلماز
دئسم  جانیم  سنه قربان ، ده گیل  بو  شأنینه  لایق
دئسم کؤنلوم سنه پیشکش، کؤنول کی، جاندان آیریلماز
شاخان شیمشکلری سؤندورمه ظالم، سن بیلیرسن می
کی  اودلار اؤلکه  سینده ، اود - الوو  وولقاندان  آیریلماز
جهاندا کیم گؤروب قان قارداشی قارداشدان آیریلسین
قورو جان، جاندان آیریلسا ، قیزیل قان قاندان آیریلماز
ریاسیز عاشق اولسان ، آیریلیق افسانه دیر ، سؤنمز
حقیقی عشق بیر بالدیر کی، شهدی شاندان آیریلماز

کریم مشروطه چی