«چالخالاندیقجا، بولاندیقجا حیات نئهره کیمی،
یاغ-یاغ اۆسته چیخیر، آیرانی آیرانلیق اولور».

شعری ده، شاعیری ده سیلکه‌له‌ییر دؤورو زامان،
پیسی بیر یانلیق اولور، یاخشی‌سی بیر یانلیق اولور.
شعر وار فیکری دایاز، وۆسعتی یوخ، سیقوتی یوخ،
عؤمرو ده، شؤهرتی ده، حیسّی ده بیر آنلیق اولور.
کیمی «میلّت» دئیه‌رک میلّتی قویموش لوغازا،
کیمی هۆمّت ائده‌رک میلّته قوربانلیق اولور.
صابیر، ای شعرمیزین، عصریمیزین نابیغه‌سی،
سؤزلرین چایتک آخیب آخیری عۆمّانلیق اولور.
نئچه توفان یاشاییر دریاجا صبرینده سنین،
لال دایانمیش دنیزین آخیری توفانلیق اولور.
شعریمیز شوروموز اۆچون اگر اولسئیدی معیار،
من ده دئیردیم سن اولان قلبیده اینسانلیق اولور.

۲۰۰۰

تانری هر یئرده پولو بیر اوره یی سخته وئره ر
معرفت مفته دی چون ، کاسب بدبخته وئره ر
حاجی رستم عمی یه یئددی اوغول جمله غنی
لیک بقال جبی یه یئددی قیزی سفته وئره ر
یئکه سقال کیشی یه ایل اوزونو گونده پیلو
لیک آبدال کوسایا هفته ده بیر کوفته وئره ر



صابر

قارغا و تولکو  هوپ هوپ نامه دن

پئندیر آغزیندا بیر قارا قارغا
اوچاراق قوندو بیر اوجا بوداغا
تولکو گؤرجک یاواش – یاواش گلدی
اندیریب باش ادبله چؤمبلدی
بیر زامان حسرت ایله قارغا ساری
آلتدان – آلتدان ماریتدی باش یوخاری
دئدی: «احسن سنه، آ قارغا آغا!
نه نزاکتله قونموسان بوداغا!
بزه دین سن بوگون بیزیم چمنی
شاد قیلدین بو گلمه یینله منی
نه گؤزه لسن، نه خوش لقاسن سن
یئری وار سؤیله سم – هماسن سن
توکلریندیر ایپک کیمی پارلاق
بد نظردن وجودون اولسون ایراق!
بو یقین دیر کی، وار سئویملی سسین
اوخو، وئرسین منه صفا نفسین!»
بؤیله سؤزدن فرحله نیب قارغا
آغزینی آچدی تا کی، ائتسین – غا
«غا» ائده رکن هنوز بیرجه کره
پئندیری دیمدیییندن ائندی یئره
تولکو فوراً هواده قاپدی یئدی
قارغایا طعنه ایله بؤیله دئدی:
«اولماسایدی جهاندا سارساقلار
آج قالاردی یقین کی، یالتاقلار»!

میرزا علی‌اکبر طاهرزاده صابر

ملّت نئجه تاراج اولور اولسون نه ایشیم وار
دشمنلره محتاج اولور اولسون نه ایشیم وار
قوی من توخ اولوم، اؤزگه لرایله نه دی کاریم
دنیا و جهان آج اولور اولسون نه ایشیم وار

سس سالما، یاتانلار آییلار، قوی هله یاتسون
یاتمیشلاری راضی دئییلم کیمسه اویاتسون
تک تک آییلان وارسا دا حق دادیما چاتسون
من سالم اولوم جمله جهان باتسا دا باتسون

ملت نئجه تاراج اولور اولسون نه ایشیم وار
دشمنلره محتاج اولور اولسون نه ایشیم وار

سالما یادیما صحبت تاریخ جهانی
ایامِ سلفدن دئمه سؤز، بیرده فلانی
حال ایسه گتور میل ائلییوم دولمانی نانی
مستقبلی گورمک، نه گرک، عمردی فانی

ملت نئجه تاراج اولور اولسون نه ایشیم وار
دشمنلره محتاج اولور اولسون نه ایشیم وار

اولاد وطن قوی هله آواره دولانسون
چیرکاب سفالتله ائله باشی بولانسون
دول عورت ایسه سائله اولسون اودا یاتسون
آنجاق منیم آوازه شأ نم اوجالانسون

ملت نئجه تاراج اولور اولسون نه ایشیم وار
دشمنلره محتاج اولور اولسون نه ایشیم وار

هر ملت ائدیر صفحهْ دنیا ده ترقی
ائیلر هره بیر منزل و ماُوا ده ترقّی
یورغان دوشه ییمده دوشه گر یاده ترقی
بیزده ائدیریک عالم روْیاده ترقّی

ملت نئجه تاراج اولور اولسون نه ایشیم وار
دشمنلره محتاج اولور اولسون نه ایشیم وار